Vazir Qarshi davlat universitetida ochiq muloqot o‘tkazdi
Oliy ta'lim, fan va innovasiyalar vaziri Ibrohim Abdurahmonov viloyatdagi oliy ta'lim muassasalari rahbarlari, professor-o‘qituvchilar va talaba-yoshlar ishtirokida ochiq muloqot o‘tkazdi.
Qarshi davlat universitetida bo‘lib o‘tgan muloqot davomida sohadagi muhim masalalar, xususan, ta'lim sifati va samaradorligini oshirish, oliygohlarning moddiy-texnik bazasini mustahkamlash, ilm-fan, ta'lim va ishlab chiqarish o‘rtasidagi integratsiyani yanada kuchaytirish haqida fikr-mulohazalar bildirildi.
O‘z navbatida, ushbu uchrashuv yoshlarga katta kuch, motivasiya berdi. Ularning yangilikka bo‘lgan intilishi, o‘z so‘zi va fikriga ega ekanligi yig‘ilganlarda ijobiy taassurot qoldirdi.
Muloqotda kitobxonlik tanlovlarini yanada izchil tashkil etish, ingliz tilini mukammal o‘zlashtirgan talabalarning amaliyotini xorijda o‘tkazish, nazariy bilimlar bilan birga amaliy ko‘nikmalarga ega bo‘lish imkoniyatlarini tobora kengaytirish bo‘yicha ko‘plab takliflar o‘rtaga tashlandi.