11 noyabr — O‘zbekiston kasaba uyushmalari kuniga bag‘ishlangan tantanali tadbiri bo‘lib o‘tdi
Navoiy nomli viloyat musiqali drama teatrida Namangan muhandislik-qurilish institutining 11 noyabr — O‘zbekiston kasaba uyushmalari kuniga bag‘ishlangan tantanali tadbiri bo‘lib o‘tdi
Tadbirni institut rektori Sharifjon Ergashev tabrik so‘zi bilan boshlab berdi. Institut kasaba uyushma qo‘mitasi tomonidan amalga oshirilayotgan ishlarga to‘xtalib, jamoa manfaatini ko‘zlab bajarilayotgan yumushlar bardavom bo‘lishiga tilak bildirildi.
Institutning bir guruh professor-o‘qituvchilari bayram munosabati bilan kasaba uyushma qo‘mitasining esdalik sovg‘alari bilan taqdirlandi.
Shuningdek, qo‘mita sovrini uchun o‘tkazilgan voleybol musobaqasi g‘oliblariga ham sovg‘alar topshirildi.
Viloyat kasaba uyushmalari birlashmasi ma'rifiy-madaniy bo‘limi boshlig‘i Alijon Akramov, Ta'lim va fan xodimlari kasaba uyushmasi respublika kengashining viloyatdagi mas'ul tashkilotchisi Lutfiddin G‘aniev jamoani sana bilan qutlab, bayram sovg‘asi sifatida Xorazmga bepul yo‘llanmalar ajratilganini e'lon qildi.
Tadbir viloyat teatri jamoasi ijrosidagi gala-konsert bilan yakunlandi.