NamMQI talabasi WikiStipendiya loyihasi sovrindorlari qatoridan oʻrin egalladi
16-dekabr kuni WikiStipendiya loyihasining 2-mavsum yopilish marosimi boʻlib oʻtdi va marafonda gʻolib boʻlgan foydalanuvchilar taqdirlandi. Yopilish marosimida oʻzbek tilining jonkuyarlari, shuningdek, turli soha ziyolilari hamda matbuot va ommaviy axborot vositalari xodimlari ishtirok etdi.
Yopilish marosimida taqdirlashni Yoshlar ishlari agentligi direktori Alisher Saʼdullayev va loyiha asoschilaridan biri boʻlgan Mehrinoz Abbosova amalga oshirdi. Marosim davomida 2024-yil oʻtkazilishi rejalashtirilgan 3-mavsumga doir qisqacha maʼlumotlar ham berildi.
Quvonarlisi, ushbu marosimda loyihada faollik koʻrsatgan hamda sovrindorlar qatoridan oʻrin egallagan Energetika va mehnat muhofazasi fakulteti talabasi Ibrohimjon Abdufattohov munosib eʼtirof etilib, 5 mln soʻm pul mukofoti va esdalik sovgʻalari bilan taqdirlandi.
Talabamizning keyingi faoliyatiga omad va zafarlar tilaymiz!