Namangan muhandislik-qurilish instituti vakillari Yangiqo‘rg‘ondagi maktablar mutasaddilari bilan uchrashdi
Tuman madaniyat markazida o‘tkazilgan tadbir ishtirokchilari uchun institut haqidagi roliklar namoyish etildi, bukletlar taqdim etildi.
Institut birinchi prorektori Odiljon Jakbarov ishtirokchilar uchun o‘tkazgan taqdimot davomida institut salohiyati, reytinglardagi o‘rni, fakul'tet va yo‘nalishlar haqida tushunchalar berdi.
Sanoatni axborotlashtirish fakul'teti dekani Abdurahim Qahharov institut hamkori — Bauman nomidagi Moskva texnika universitetida kasbga yo‘naltirish bo‘yicha yo‘lga qo‘yilgan uslublar haqida so‘z yuritdi.
Yangiqo‘rg‘on farzandlari — Beruniy nomli davlat stipendiyalari sohiblari Oyshaxon Qodirova, Osimxon Sayfiddinov, Transport fakul'teti yoshlar koordinatori Kamola Ergasheva natija va yutuqlari haqida hikoya qildi.
Tuman hokimining o‘rinbosari Esonbek Mehmonov bitiruvchilarning oliy o‘quv yurtlariga kirish ko‘rsatkichlarini tahlil qilib, bu kabi tadbirlar mavjud vaziyatni yanada yaxshilashga xizmat qilishini ta'kidladi.