Namangan muhandislik-qurilish instituti rektori Sharifjon Ergashevning Yangi yil tabrigi
Hurmatli professor-o‘qituvchilar, qadrli ishchi-xodimlar, aziz talabalar!
Barchangizni kirib kelayotgan 2024 yil bilan institut rektorati va shaxsan o‘z nomimdan chin dildan qutlayman. O‘qish va ishlaringizga rivoj, xonadonlaringizga fayz-baraka tilayman.
Yil yakunida o‘tayotgan sanani sarhisob qilish odat tusiga kirgan. 2023 yil institutimiz uchun juda samarali kechdi deb aytishga haqlimiz.
Xalqaro reytinglardagi o‘rnimizni yanada mustahkamladik, milliy reytingda peshqadamlar safida bo‘ldik. 35 nafar vakilimiz dissertasiyalarini muvaffaqiyatli himoya qildi, 6 nafari professor, 19 nafari esa dosent ilmiy unvonlarini oldi. Ikkita yangi ilmiy kengash faoliyatini boshladi.
"Tadqiqot va taraqqiyot" nomli yangi ilmiy jurnal ta'sis etildi. 83 ta monografiya nashr qilindi. 10 ta patent, 190 ta guvohnoma olindi.
150 nafardan ortiq professor-o‘qituvchi va talabalarimiz malaka oshirish, amaliyot o‘tash uchun xorijda bo‘lib qaytdi. 6 nafar talaba Prezident va davlat nomli stipendiyalari sohibi bo‘ldi. Davlat rahbari tashabbusi bilan institutda Bionika laboratoriyasi ochildi.
Aziz do‘stlar!
Bu kabi natijalarni yana uzoq sanab o‘tish mumkin. Ularning barchasida jamoamiz, talabalarimizning munosib hissasi bor. Istagimiz — 2024 yilda muvaffaqiyatlarimiz soni va salmog‘i bundan ham ko‘p bo‘lsin.
Faoliyatimizga ko‘z tegmasin, oilalarimiz tinch-omon bo‘lsin, kirib kelayotgan Yangi yil barchamizga muborak bo‘lsin!