"Kelajak bunyodkori" medali sohibasi ishtirokida "Kelajakka qadam" loyihasi taqdim etildi
Institut kichik majlislar zalida Yoshlar ittifoqi Boshlangʻich tashkiloti tomonidan isteʼdodi va oʻqishdagi muvaffaqiyatlari bilan tengdoshlariga oʻrnak boʻlib kelayotgan yoshlar orqali talabalarda motivatsion kayfiyatni shakllantirish maqsadida yoʻlga qoʻyilgan loyiha taqdimoti boʻlib oʻtdi.
Tadbirda institut birinchi prorektori Odiljon Jakbarov, rektor maslahatchilari Abdurahmon Shokirov, Diyorbek Soataliyev, nomli davlat stipendiyalari sohiblari va iqtidorli talaba-yoshlar ishtirok etdi.
Loyiha mehmoni sifatida taklif etilgan "Kelajak bunyodkori" medali sohibasi, NamDPI yoshlar yetakchisi Mastura Nabixonova yurtimizda yaratilayotgan imkoniyatlar, davlat mukofotini qabul qilib olishdagi hayajoni va Prezidentning yoshlarga ishonch bildirayotgani haqidagi fikrlari bilan oʻrtoqlashdi.
Loyiha yakunida mehmonga institut rahbariyatining tashakkurnomasi va esdalik sovgʻalari taqdim etildi.