1-mart — Oʻzbekiston xalq shoiri Zulfiya tavallud topgan kun
Ardoqli oʻzbek shoirasi Zulfiya 1915-yilning 1-martida Toshkent shahrida tugʻilgan. Shoira mehnat faoliyatini juda erta boshlagan. Bir umr jurnalistika hamda nashriyot sohasida ishladi.
U 1935-1938-yillarda Til va adabiyot instituti aspiranti, 1938-1948-yillarda “Bolalar” nashriyoti muharriri, Oʻzbekiston davlat nashriyoti boʻlim mudiri, 1953-yilgacha “Saodat” jurnalida boʻlim mudiri, 1953-yildan to 1980-yilga qadar, salkam oʻttiz yil davomida shu jurnalning bosh muharriri lavozimida ishlab keldi.
Hamid Olimjonning turmush oʻrtogʻi, hassos sheʼriyati bilan millionlab qalblarni maftun etgan shoira 1996-yilning 1-avgustida vafot etdi.