Shanxay hamkorlik tashkilotining Samarqand sammiti: o‘zaro bog‘liqlikdagi dunyoda muloqot va hamkorlik
Prezident Shavkat Mirziyoevning “Shanxay hamkorlik tashkilotining Samarqand sammiti: o‘zaro bog‘liqlikdagi dunyoda muloqot va hamkorlik” nomli maqolasi muhokamasiga bag‘ishlangan davra suhbati bo‘lib o‘tdi
NamMQI media markazi tashabbusi bilan tashkillangan tadbirni institut yoshlar masalalari va ma’naviy-ma’rifiy ishlar bo‘yicha prorektori Odiljon Jakbarov olib bordi.
Maqolaning mohiyati va asosiy yo‘nalishlari haqida institut matbuot kotibi Azizbek Abduvaliev ma’ruza qildi. Ta’kidlanganidek, ushbu maqola nafaqat mamlakatimiz, balki xorijdagi qator nufuzli gazeta va internet-nashrlarida ham ko‘chirib bosildi.
Maqola “Muvaffaqiyatli mintaqaviy hamkorlik modeli”, “O‘zbekistonning ShHTdagi raisligi: birgalikda rivojlanish orqali umumiy muvaffaqiyat sari” hamda “Samarqand ruhi’ – hamkorlik, o‘zaro anglashuv va do‘stlik ifodasi” kabi ruknlarga bo‘lingan va ularning har birida asosiy mavzu — samarali xalqaro hamkorlik dunyoda barqaror, ishonchli va farovon taraqqiyotning eng muhim omili ekanligi, aynan shunday yondashuv dolzarb muammolarni bahamjihat hal etish, yangi xavf-xatar va ijtimoiy larzalardan himoyalanish uchun eng aniq, maqbul va samarali yo‘l hisoblanishi singdirilgan.
Davra suhbatida so‘zga chiqqan institut ijtimoiy fanlar kafedrasi mudiri Bahodir Akbarov, katta o‘qituvchi Alisher Otaxonov va boshqalar ushbu maqola nafaqat professor-o‘qituvchilar, balki talaba-yoshlar o‘rtasida ham o‘qilishi va o‘rganilishi muhim ekanligini ta’kidladi.
NamMQI media markazi