NamMQI vakillari Xalqaro gullar festivali arafasida plogging aksiyasini oʻtkazdi
Namangan muhandislik-qurilish instituti rektori tashabbusi bilan 63-anʼanaviy Xalqaro gullar festivali arafasida atrof-muhit ifloslanishining oldini olish, tabiatni asrash, viloyatni ekologik toza hududga aylantirishga qaratilgan plogging, yaʼni yugurish va chiqindi yigʻish jarayoni uygʻunlashgan aksiya tashkil etildi.
Tadbirda institut rektori va prorektorlar, maslahatchilar, boʻlim boshliqlari, fakultet dekanlari, tyutorlar, yoshlar koordinatorlari va volontyor talabalardan iborat katta jamoa ishtirok etdi.
Aksiya Namangan shahri va Toʻraqoʻrgʻon tumanini birlashtiruvchi magistral yoʻlda joylashgan chiqindi yigʻish poligoni hududida boʻlib oʻtdi. Ishtirokchilar poligon atrofini chiqindilardan tozaladi, hududni obodonlashtirishga hissa qoʻshdi.
Tadbir yakunida koʻngilli ravishda tashkil etilgan xayrli ishda faol boʻlgan barchaga minnatdorlik bildirildi.
NamMQI media markazi