Rektor institut axborot-resurs markaziga shaxsiy kutubxonasidagi kitoblarni sovg‘a qildi
Namangan muhandislik-qurilish institutida “Kitob sovg‘a qilamiz” aksiyasi boshlandi. Ushbu aksiya doirasi professor-o‘qituvchilar institut axborot-resurs markaziga ilmiy va badiiy adabiyotlarni topshirmoqda.
Bugun NamMQI rektori Sharibboy Ergashev institut axborot-resurs markazida bo‘lib, shaxsiy kutubxonasidagi 300 ga yaqin kitoblarni taqdim etdi. Ular orasida o‘zbek, rus va ingliz tillaridagi qurilish, me'morchilik, avtomobilsozlik, agronomiya, tarix, adabiyot va biznesga oid ko‘plab nodir asarlar bor.
“Bu xayrli tashabbusga hissamni qo‘shayotganimdan mamnunman. Professor-o‘qituvchilarimiz bisotida talabalar bilimini boyitadigan kitoblar, mualliflik asarlari ko‘pligiga aksiya davomida guvoh bo‘lib turibmiz. Bu bilan yoshlarimizning kitob va kitobxonlikka qiziqishi yanada ortishiga sababchi bo‘lsak ajab emas”, — deydi institut rektori.
Ma'lumot uchun, NamMQI axborot-resurs markazi bugungi kunda 155 ming kitob fondiga ega.
NamMQI media markazi